22. 3. 2024:  Новосадьскый торг книжок привітав і русиньскых выдавателїв

В рамках Новосадьского торгу, котрых одбывать ся од 18-го до 25-го марца 2024-го року, проходить і Новосадьскый торг книжок. Як інформовала аґентура Рутенпрес, в четверь, 21-го марца, представили ся на тій події і русиньскы выдавателї з Войводины – НВУ Руске слово і Завод про културу войводиньскых Русинів.

Борис Варґа, директор выдавательства Руске слово, в рамках презентації присутным повів, же 20 новых публікацій, котры были надрукованы почас попереднього і початком того року, свідчіть о тім, же то єден із найуспішнїшых років выдавательства.

Часть вышла вдяка партнерству і сполупраці з далшыма русиньскыма інштітуціями і орґанізаціями у Сербії, наприклад із Заводом про културу войводиньскых Русинів ці Катедров русиністікы на Новосадьскій універзітї.

Презентація мала в мерьку три катеґорії книг – найновішы, котры з друку вышли по Меджінароднім торгу книжок в Белеградї, далше выданя, котры лишыли окремый слїд в попереднїм періодї, а так само публіцістічны выданя, котры вышли в Едіції Фундаменты вдяка спілупаці НВУ Руске слово і Заводу про културу войводиньскых Русинів.

На презентацію пришли і авторы книжок, котры были представлены, наприклад Іріна Гарді Ковачевіч, Меланія Римар ці редакторы окремых выдань як Блажена Хома Цветковіч або Александер Паланчанин.

В рамках Новосадьского торгу книжок были одпрезентованы і актуалны выданя, котры приготовила орґанізація Руска матка, член Світового конґресу Русинів. За тоту орґанізацію презентовав книжкы їй голова – Михайло Фейса.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Рутенпрес